Fetinao anio ry Taniko (raozigasy)

Fetinao anio ry taniko
Ka ny vavako alamiko
Sy atokako ho anao
Amin’izao anio izao

Fetinao anio ry taniko
Ka adinoiko kely ny amiko
Fa ny hatako rehetra
Dia ho anao tsy misy fetra

Mangataka aminao ry Ray
Tahionao ny taninay
Tahionao ity firenena
Izay latsaka an-katerena

Mangataka aminao ry Ray
Mba hampangino kely indray
Ilay adilahy, sy disadisa
Ilay politika mila kisa

Mangataka aminao ry Ray
Jereo ny tanindrazanay
Jereo ny ho avin’ny tanora
Mba hiova moramora

Mangataka aminao ry Ray
Mangataka aminao indray
Jereo Madagasikara
Mba tsy hihomehezan’ny tantara

Izao vavaka izao
Dia iarahanay manao
Amin’ilay vavaka izay
Nampianarinao anay

Rainay izay any an-danitra ...
--------