Hangina hono (raozigasy)

Fa hofatorana tsy hanoratra, hono ireto rantsan-tanako
Dia hogejaina tsy hamoaka, izay fanahy miranga mba ananako
Dia hofefena aho, horarana, tsy hizara ireo vinaniko
Hodidiana tsy hamboraka, ireo hetaheta izay mba mamiko

Fa hakombona tsy hamoaka feo, koa hono izato vavako
Dia hoterena tsy hampiseho, endri-tsiky koa ny tavako
Hotakonana ny masoko, hamefy izay baliakan-jery
Dia ny sofiko hotampenana, tsy handre ilay teniko irery

Dia ny saiko hodontoina, amin’ny asa mahalanaka
Dia ny lohako hopepoina, ka ny fisaina tsy halalaka
Dia ny foko atao an-keriny, sao mitombo fitempoana
Dia ny vatako vizanina amin’ny asam-panompoana

Dia hoy aho nihomehy anaty, ho vizana ianao ry mpialona
Sa mihetsika hadalana ianao, fa izato tetikao toa lalina
Fa na rojo vy na gadran-tsaina, na teny feno horohoro
Tsy ampy hampangina ahy amin’ny teny tiako hajoro
--------