IZAHO ILAY TAMBANIVOHI-BAVY (raozigasy)

IZAHO ILAY TAMBANIVOHI-BAVY

Akanjo manga efa tonta
Sy tenisy efa draoka
No nentiko niseho vahoaka,
Ka toy ny vely kanonta
Tam-parahatoko tao
Ny filazana tan-gazety
Hoe: “tongava aty ianao
Ka manaova metimety
Fa laharana voalohany
No azonao ry Poety
Tena tsara fanombohany.”

Ny fahantrako, ô indrisy!
Tsy mba azoko nafenina,
Ranomaso tsy hay tenenina
Moa hanakatra tsy misy?

Notoneko aloha ny saiko
Tamin’izay fotoana izay
Tena vonona aho handray
Ny loka efa nantenaiko
Dia … narahabainao tsirairay
Ny fahatelo, ny faharoa
Arahina oroka avokoa
Sy tsiky ary teny mamy
Hoe: “tohizo hatrany hatrany an!”.

Fa nony mby amin’izay
Voatonona ny anarako
Hanoloranao ny anjarako:
Zara ianao nandray ny tanako
Dia nihataka hafahafa
Ts’isy teny, ts’isy tafa…
Teo aho, nangasihasy,
Toa tsy te hijery olona
Eny ho aho ry Malagasy:
Mbola henjana ny tolona,

Tsy ny horokao sanatria
No zava-dehibe tamiko
Fa ilay: “tsy izy ity”
No nampitraho ny tomaniko
Sy ny eso nanao hoe
“dia izay io avy ve?”







Andao fa ho hita eny ihany
Izay ho tohin’ny tantara
Mbola ho ambony ny ambany
Fa ny “ratsy” mbola ho “tsara”.
Ny fikirizako rehetra
No nakambako hamahana
Ny fangejan’ito hetra
Nateraky ny fahantrana.
Ny hambom-poko tafahoatra
No nanosika ahy hivoatra.

ANKEHITRINY KOSA,
Endrey! Tonga ity ianao,
Saingy efa osaosa,
Mandondona izato efitrano fiasako:
Dieny mbola tsy misondrotra
Amin’izao ny tosi-drako
Dia ivereno kely indray
Ny varavarana nidirana
Tsy jereko akory
Izay tarehy mody mirana
Tsy henoiko akory
Izay resa-balamaty
Fa ny ahy ny alahelo
Efa latsaka any anaty.

Mandehana ry olom-be
Sao lazaiko ho mpamosavy
Hadinonao angaha, f’izaho
Ilay Tambanivohi-bavy?


HAJAINA
Okt 2000


Tsetsatsetsa tsy haritra fotsiny e!
--------