Tanalahy (raozigasy)

Ekeko ny masoko hoe mivontirika, sy ngeza dia ngeza tsy misy ohatr’izany
Kanefa aho mahita ny zava-drehetra, ny aloha, ny aoriana, ny ambony, ny ambany

Ekeko ny lelako hoe maharikoriko, malilalila sy lava dia lava
Kanefa izy mahazo izay haza tiany, raha vao misokatra kely ny vava

Ekeko ny lokoko hoe mampahatahotra, ary ny hoditro tsy mahate hikasika
Kanefa iny no manda fiarovako, iovako loko, na an-kazo na am-pasika

Ekeko ny diako hoe mandroso mihemotra, mandinika aloha vao sahy miroso
Kanefa izay ny ahy no fahendrena, mandalina, tsara fa tsy misosososo

K’ianao ra-olombelona manaova toa ahy
Mijere, mandiniha, vao manao raharaha
F’izaho aza bitika, mahay an’izany
Maika f’ianao mpanjakan’ny tany
--------