Tati-bolana (raozigasy)

Tsy nivadika ny volana
Dia hitako nitati-bolana
Ilay pejim-“pacebook”
Nanao pentsona boloky

Nilaza izy ka nilaza
Hoe misy ankizy, misy zaza
Misy maoty, vantovantotra
Misy lehibe, misy antitrantitra

Misy mangalatra am-piasana
Misy an-trano ka tamana
Misy tsy mahafoy ilay finday
Fa n’aiza n’aiza eo indray

Misy efa sasaka ny alina
Misy maso efa lalina
Misy asa atao an-kilabao
Fa eo foana isan’andro izao

Dia nojereko tsy nilasy
Ireo tononkalon-dRaozigasy
Inona tokoa no teo
Teo no tratra ry zareo

Hay efa enin-jato
Ireo mpanaraka tsy miato
Na andavan’andro na andro fety
Mjiery eo kely fa tsy mety

Koa dia fisaorana mitafo
Sarobidy fa tsy lafo
Arahin-telina sy sitraka
No atolotra ireo mpakasitraka

Mampazoto mampahery
Hita mihitsy fa tsy irery
Mizara ireo talenta anaty
Fanahy miainga ka tsy tanty

Dia zarao hatrany hatrany,
Ireo kantotsika izay mba mamy
Io sisa no haren-tsy lefy
Hikambanantsika fefy

Dia misaotra, dia misaotra
Hoy Raozigasy faly loatra
Izay saotra tsy tobaky ny fony
Dia ho valian’ny ao Ambony
--------