08 NOVAMBRA (RFE Andria)

08 NOVAMBRA

Dimy ambinifolo taona androany
No nandaozanao ny tany
Nefa toy ny vao omaly
Ireo ketoky ny jaly
Sy ny rotsa-dranomaso
Izay nateraky ny ankaso
Ny tomanim-pahoriana
Hiaka anaty mangingina
Alahelo safomorona
Nokoboni-nahatorana...

Nilaozanao e ka mangidy
Tsy mba afa-nisafidy
F'izay no lahatra ekena
Mahaontsa, mahonena...

Ato am-ponay lalandava
Ny tsiaro anao tsy ho rava...
Sady manantena anaty
Fitsanganana amin'ny maty
Amin’izay ianao hifoha
Rehefa hiverina Jesoa

RFE Andria - 08/11/2015
--------