FAHAFAHANA (RFE Andria)
Mbola tsisy niantsa
(Nalaina tao amin'ny vetso.serasera.org)
FAHAFAHANA ?Aza tsiny indrindra re ry Gasikara tanindrazako
Raha toa aho mangina hatramin’izao tsy miarahaba
Na ny saina tsy natsangako, ao am-bata nogiazako
Sao mantsy dia maneso ity dradraina an-tabataba
Sa dia izao mihitsy no atao hoe fahaleovantena
Fa izaho no dia ketrina ary koa tena donendrina
Avy any ivelany avokoa ireo karazam-panerena
Dia ny zaza Malagasy faly milalao harendrina?
Ny mpitondra mifanesy tsy natao hahatapak’ahitra
Faly fa toloran-tseza mampidingina ny rambony
Dia mangorona harena, matimatim-boninahitra
Raha ny fampandrosoana dia ataony ambinambiny
Ny vahoaka Malagasy indray ihomehezan’ny vahiny
Ny fireneny dia esoiny: lazainy fa an’ny babakoto
Aiza izao ilay fahafahana nimatesana fahiny
Izay nanaovana vy very nihosoram-bovoka maloto?
Aza tsiny indrindra re ry Gasikara tanindrazako
Raha toa aho mangina hatramin’izao tsy miarahaba
Ny saina aza tsy natsangako, ao am-bata nogiazako…
Tsy maninona aho irery no avelao hibabababa
RFE Andria – 26/06/2015
--------
Rohy:
Sokajy :
Tanindrazana
