HONO HO'AHO....? (RFE Andria)

Hono ho’aho …. ?

Hono ho’aho,
Maty ve ilay fitia
Noheveriko ho doria?
Fa teny an-tanan’olon-kafa
No nahitako anao nitafa,
Sambatra sy faly erỳ toy ny mpifankatia.
Tsy niteny aho fa nangina
Sy variana dia variana.
Tsy nahaloa-bava akory,
Hany heriko natory.

Hono ho’aho ry malala,
Moa ianao tsy mankahala?
Tiako ianao! Tiako loatra!
Nefa aho tsy afaka manoatra.
Tsia!
Tsy mety mino izao ny saiko
Raha ilay olona lalaiko
No ho tia olon-kafa
Ka hanjary hihafahafa.

Ry malala ô! Valio,
Tsy ampitso fa anio:
Maty ve ilay fitia
Noheveriko ho doria?

RFE Andria
--------