KAMBOTY SY MPITONDRATENA (RFE Andria)

KAMBOTY SY MPITONDRATENA

Mba sompatra loatra ity fiainana an-tany
Fa tena mafaitra, mangidy aok’izany
Mampitanondrika, mampitomany
Ny jaly vao lasa, ny eo misosoka ihany

Ilay andry niankinana, indray mipí-maso
Nidaraboka an-tany tsy nisy andraso
Nindaosinao r’ilay fahafatesana
Ny vady aman-janany mitondra faisana

Ny vadiny anefa vao nihetsi-jaza
Notampohin’ny anjara izay tsy sahaza
Namoy teo noho eo ilay olo-malala
Mila hitapy sy ho lasa adala

Kamboty vao teraka ny sombin’ny ainy
Ny nahaterahany no maty ny rainy
Mafy any izany na mbola tsy hainy
Rehefa lehibe mbola handona ny sainy

Soa fa misy ihany fanantenana
Azo amikirana, dia teny fikasana
Nomen’Andriamanitra Ray tsy mandao
Ao amin’ny Teniny ilay toy izao:
“Ilaozy ny zanakao ho kamboty,
fa Izaho no hamelona azy,
ary aoka Izaho no hitokian'
ny vadinao mpitondratena.”
(Jeremia 49:11)

Na izany na tsy izany ry mpamily fiara
Tandremo! Tandremo sao mamarara
Ka hahatonga kamboty tsy fidiny
Sy mpitondratena izay ho faraidiny

RFE Andria – 15/06/2015
--------