TSY HAIKO (RFE Andria)

TSY HAIKO

Tsy haiko ny manova ny mainty ho lasa fotsy
Ka handangolango, handainga, handrotsirotsy

Tsy haiko ny hamindra, tsy taitra, moramora
Anefa aho te-hiolomay hanenjikenjika ora

Tsy haiko ny hangina ka tsy hiloa-bava
Kanefa ny ato am-poko misoritra eny an-tava

Tsy haiko ny hanafina ary tsy hikalo
Ireo hira mby imolotro tsy foiko atakalo

Tsy haiko ny ho tony, halamin'ny feon-gitara
Kanefa ny ato anatiko dia misamboaravoara

Eny,
Tsy haiko, tena tsy haiko ny tsy hamboraka amin-dry
Ny ato am-poko manontolo ka hibaboka fa TIA...!

RFE Andria - 30/11/14
--------