orana... (voatsinampy)

Notondrahanao ry orana
ilay fitiavako efa torana
ka nifoha lasa nijery
ilay aretiny sy fery
noho Ianao ilay nandao
tsy nisaina izay natao
fa nandeha nanifi-drano
mba hitady fararano

Notondrahanao ry orana
lay foko voly sy nangorana
ka eto am-baravaran-kely
no mametsovetso irery
eto antsefa-tsela-baratra
no miandranandrana mitatratra
sao mba any Izy izay
ka hiombona indray izahay

Notondrahanao ry orana
lay foko voly sy nangorana
ka nitrebona namony
ilay fitiavako efa tony
lay fahatsiarovana nalazo
vao miha namony voninkazo
maso kotsan'ny tomany
no niotazako an'izany
--------