Malagasy ve ? (Aloky Ny Sento )

Malagasy ve...
Malagasy ve rey olona isika Gasy ankehitriny?
Mianjaika ireo lamaodim-pitanjahan'ny vahiny
Manadino ny fisiany sy tanàna niaviany
Manafoka ny fahiny, ny hasiny nariany
Malagasy ve rey olona ireo olom-pitondrana?
Manaiky ny hafa firenena hibodo tanim-panjakana
Mamela antsika iadidianay hiaina anaty fahantrana
Mampahory ny vahoaka, manampa-pahefana
Malagasy ve rey olona ireny Malagasy ireny?
Tsy miteny gasy intsony raha miarahaba ray sy reny
Tsy miteny gasy intsony raha mamaly tsia sy eny
Tsy miteny gasy intsony raha miresaka eny ho eny
Malagasy ve rey olona ireo mpanary ny kolontsainy
Ny an'ny hafa andrianiny hanjakazaka ao an-tsainy
Ny an'ny hafa no jifainy mba ho zavatra lalainy
Indrisy, ny azy kosa lahy toa hafokainy, tsy ilainy
--------