OMEKO FAHAFAHANA (fanasina7)

Omeko fahafahana
Ny foko sy fitiavako
Mb’hitia anao rahavako.

Omeko fahafahana
Hitia tsy hihambahamba,
Tsy hanao intsony angamba !


Omeko fahafahana
Tsy hisalasala
Handray anao « am-bala » !

Fa feno taona ianao :
Manan-jo sy afa-tsaona,
Afaka mifidy sy mandidy
Izay heverinao ho safidy,
Sy koa zava-tsarobidy.

Fa tonga taona ianao,
Afa-java-natahorana,
Sy tapa-tady nifatorana ;
Nahazo fahafahana :
Hampitroatra ny fitiavana !

Omeko fahafahana
Hiarahaba anao ny saiko,
Hankamamy anao ny aiko,
Hankatelina ny fanahiko.

Omeko fahafahana
Ny foko mba hifaly
Satria afa-jaly :
« Efa lasa ny omaly » !

Omeko fahafahana
Hibanjina ny ho avy,
Ho vonona sahady
Handray anao ho vady !
--------