SOA (fanasina7)

Tsy misy tsy mibitsika izay nanara-maso
Ny fiarahantsika :
« Ahoana no hiafarany, hitohy sa hiato ?
- Angamba izay no vita ! »

Ireo nitsiriritra kosa ny toeranao
Dia injao saika hibitaka.
Kanjo ny ahy no tonga aloha : « ny foko onenanao »
- Dia nangaina ka nisintaka –

Ireo mpanaraby indray sy irony mpanakora
Dia indreo nitampim-bava,
Nanantena ho « vita ho azy » sy ny « ho rava mora »
- Hay vao maika tsara laza :

Fa ny fifankatiavantsika, tsy an-jaza velively
Satria voaporofo tsotra izao fa fo no mifamatotra
Matoa tsy ravam-belively, ferifery, teritery
Sy elanelan-tany, mahafanina, mandifotra.

- Dia hoy aho hoe : « Efa izay no lahatra ! »

- Soa ! –
--------