MAMORONA! (Fidy Art Niaina)

Mamorona tsiky anaty alahelo
Dia aza, akory, mihevi-tena ny ho singan-drery
Ny hakiviana reseo! Aza avela hanjaka!
Arodany izay manakana sy izay maneritery

Mamorona diavolana amin'ny ali-maizin-kitroka
Dia fenoy kintana ny lanitra efa mainty
Raha sendra hovitrovitra; tsy hita izay hafitsoka
Avondrony avokoa ny hery ao anaty

Mamorona hira amin'ny volon'androm-pahavaratra
Vazo tsotra hokaloina raha sendra ka tomany
Na aza mitsilopy ny fanilo mba mitaratra
Fadio ny mihemotra fa tozoy hatrany hatrany

Mamorona hehy amin'ny habaka fisaonana
Mba ho voatsinampy hanasitrana ny rofy
Izay kely vitanao hosinetrinay fisaorana
Ianao ilay poeta; mpanatontosa nofinofy

Fidy Art Niaina
--------