Manina anao... (Ny R. FIDIMANANTSOA)

Hielina foana ny topim-binany
afafin’ny tsiaro misoko mangina;
Rehefa mahery ‘zay onjan’izany,
Iza no tsy hahatsiaro olontiana?

Ny foko, aza, nony tsy eto iny ianao,
injany fa reko mitepo mahery;
Asaina mitony kanefa injao
Ianao no antsoiny hofihininy irery.

Ny embona manko...! tsy haiko resena;
Ampy hahafaty ny foko efa tia.
Manina anao aho ka zary jambena,
Atopatopan’ny tsiaro satria:

Mamiko ianao, sady tena lalaiko;
Ianao irery, tsy mila mpanampy;
Kanto tsy hisy hahasolo ato an-tsaiko;
Ody alahelon’ny foko niantsampy

Ny R. FIDIMANANTSOA
--------