Nofy no hampifaly (RAKOTOMALALA Tanjona Mandimbison)

Raha sendra nolaviny ny faniriana...
Ny nolavina mantsy,tsy ekena ho tiana
Ny fo no maratra,fangirifiriana!
Nofy no antsoy,hitondra hafaliana!

Irony tia raha toa ka nolavina,
Indrisy misento!fa tsy notiavina!
Mionona,hono,ka ny lalana no diavina...
Hanova no sisa,fa fo efa niavona!

...Miavia ry nofy,miavia mba hampifaly!
Ny fo izay nolaviny?-indro mijaly!
Nolavin-tiana no indro miangaly,
Nofinofy mamy...fa zary tomany!

Sary manjavona...,nofy izany!
Fo manantena,nofy ihany!
Nolavin-tiana no tena tomany
Ny anaty nofy kosa,tsy lavon'izany!

Nofy manomboka,anilan'ny malala
Nofy mifarana,mijoro hampamanala...
Toa nofy sisa fa nilaoza-malala?
Nolavina anie,ka tokony hiala...!

Tsy azo terena ny efa tsy tia
Aleo mampionona ny fo mba tsy hankafy...
Mahereza,eny anefa,mahatokia...
Manàna hambo,ka miovà fitia!

...Dia rehefa misinda ilay fitia nijaliana,
Rehefa miova fifalifaliana...
Mba tsarovy ihany ny taloha,d'ilay tiana
Tandremo,eny anefa!ny fonao efa sina...!
Ny RTM
--------