Mitady anao (Pissoa)

Nodinihiko akaiky : "efa nirindrina ny fasana !"
Izay no tena nahatsapako fa lasa ianao, tena lasana
Dia nahodiko ny lohako ... "Efa nirava koa ny olona !"
Ka ny alahelo anao no sisa nisavika ahy, nitambolona.

Dia noferako ny masoko : "Aoka ianao tsy hitomany !"
Notereko koa ny vavako : "Mangidy io fa tsy maintsy lany !"
Nobedesiko ny foko : "Mba meteza ianao hitony !"
Nofeheziko ny saiko tsy hanonofy anao intsony.

Dia nihevitra aho fa sitrana, efa nanolatra ny feriko
Efa mazava indray ny lalako - mamiratra izay jineriko
Hay tsy nampoiziko akory, nitsipalotra ny masoko
Indro tao anaty vata misy ny lamba voapasoko ;

Toa nihantsy ny eritreritro : inona ary izy izany
Fa miavaka ny lokony anaty manga, mainty, volontany ?
Valopy fotsy, gasigasy, misy diam-peninao
Vaosoratra matevina : "Avy amin'i Neny tianao" !

Nakaratoko ilay vata, ny tanako aza tery, mongo !
Tsy tandritandriko akory ity izaho nigogogogo
Tsy voafetrako ny masoko, ny vavako ... tsy haiko
Tsy voabediko ny foko, tsy voafehiko ny saiko

Izay no tena nahatsapako fa nandainga aho hatrizay
Nihevi-tena ho lehibe, haharitra izay mahamay
Mba niezaka aho nitraka, tena niezaka fa ho aiza
Hay ny amiko rehetra nitady anao hatraiza hatraiza !

Mitady anao hatraiza hatraiza

Pissoa
(26 Septambra 2007)
--------