Fan Zone (raozigasy)

Nantsain'i
(Nalaina tao amin'ny vetso.serasera.org)
Izaho tsy mpijery baolina, fa nanara-drenirano
Niaraka nirona, toy ny isan-tokantrano
Voatariky ny ainga Alefa Barea
Dia lasa koa nivoaka hoe handeha hizaha

Feno Fan Zone moa izay rehetra aleha
Moa mitovy dia daholo ny olona mpandeha
Handeha hijery baolina, hanohana, hampahery
Ny ekipa malagasy, mba tsy hiady irery

Iny ary aho fa niditra, nisolana irery
Nanavatsava tsara ireto olona mpijery
Avy hatrany gaga, fa izay rehetra tao
Niarahaba ahy daholo, nanontany vaovao

Dia iny aho naka toerana, nividy koa labiera
Ireo manodidina ahy, tonga dia nandona vera
Iny aho fa tafiditra, nahazo aina avy hatrany
Ka avy dia niresaka, nisangy , nihanihany

Raikitra ny baolina, hitako tao daholo
Ny fientanam-pon’ny malagasy manontolo
Niaraka nihoraka, niaraka nikiaka
Niara nalahelo, niaraka sariaka

Tsy nisy intsony fefy, na politika na saranga
Malagasy iray no tao n’inona n’inona nitranga
Niray fo, niray hira, niray sento, niray hina
Satria tokan-tanjona, sy tokam-paniriana

……


Teo amin’ny ankaviako, nisy ankizivavy iray
Barea iringiriny hatrany amin’ny tsinay
Ny akanjo ara-penitra, maitso fotsy mena
Ny takolaka miloko sainam-pirenena

Vao misy seho mitranga, dia azy koa ny vava
Mihoraka izy, mihiaka, indraindray manampim-bava
Tampoka izy faly, tampoka izy moana
Vao misy tranga kely, dia mijery aty foana

Izaho lasa toa azy, nanarakaraka onja
Nanarakaraka hefa, hita hoe vao indray monja
No nijery baolina, ny lalànany aza tsy haiko
Fa ny dikam-pihetsiny, no nanjary toa nibaiko

Nony kelikely, takaikiny aho nikisaka
Menamenatra aloha, sy namitsapitsaka
Rehefa nandroso nihafana ny lalao
Izay vao mba sahisahy, toa nahazo aina vao

Dia teo izahay roa, niaraka nirona
Nifanakalo jery, nifanakalo dona
Nifanakalo sento, nifanakalo hiaka
Toa olona ankiroa, adala sy mivika

….

Rehefa tapitra ny baolina, ny rehetra nangingina
Resy ilay notohanana, tsy to ilay faniriana
Nifampisaotra fotsiny, nifampidera na dia resy
Dia niaraka nandamina ilay tranon-kerimesy

Izahay roa koa moa, toa mbola nazotozoto
Niaraka nanangona, ireo fako sy ny loto
Tsy nisy iraka na baiko, fa toa nahatsapa tena
Hoe adidy no natao, fa tsy nisy hoe noterena

Rehefa vita izay, dia niomana izy handeha
Ny veloma nataony, fihina indray mandeha
Nasampiny ny entany, noraofiny ilay lamba
Ny kopaka nataony, hoe mbola hihaona angamba

Izaho mbola nivanaka …lozako oadray
tena adinoko ny naka ny laharan’ny finday
nanantena mbola hihaona, hay moa… tapaka ny lalana
Barea kay moa tsy tody antsasa-dalana

dia nody ny rehetra, nirava koa ny tsena
izaho irery teo tavela, tsy hay fa nihenahena
vita izay ny baolina, vita izay ny fety
dia iny koa aho nody, irery hilalao kanety

….

Raha sendra eto ianao mamaky ity hadalako
Dia tadidio isika roa ilay nandroaka fako
Izaho ilay bandy sola, nanao solomaso
Tsy sahy niteny akory, hoe vetivety andraso

Tsy sahy na hampiresaka, hanontany anarana
Androany aho anefa te hanova, Fandaharana
Raha azoko naverina ilay indray andro iny
Dia naveriko mihitsy, tsy nanaovako vahiny

Raha sendra ato ianao, r’ilay olona tsy haiko
Mba valio re azafady a, fa marary ange ny saiko
Ilay tany amin’ny Fan Zone, mba tiako hitohy ange
Dia aza misalasala an, mandefasa mp

© Raozigasy 13/07/2019
--------
Rohy:
2251 1
Hevitra mandeha
AZTECA ( 17/07/2019 08:17)
tsara be ....

...
ka iny lesy izy iny, mba ivavaho ihany
tsy ho lasan'olona any....
...
(toly)
hery ( 17/07/2019 16:54)
ireny bandy sola manao solomaso ireny ho'aho tsy mba sahisahy mihitsy loll
ikalamako ( 18/07/2019 08:45)
tpt... taitra ny olona tsy mba taitra fa taitra irery vao mipenimpenina manao tononkalo
Hametraka hevitra
Midira aloha
© Eugene Heriniaina - serasera.org 1999 - 2024 - page load 0.0279