IZAY MANGINA VOLAMENA (RFE Andria)

Izay Mangina Volamena

Inona ary no hambara,
Fa mitohy ilay tantara
Ka mitsoka farara
Eo ambony farafara
Sisa hany ataon’i Fara?
Fa tsy ilaoza-mamarara
Ny saonjo iray lohasaha;
Ka andeha mba hizaha
Raha mba misy koa fanahy
Hampitony ny ahiahy;
Fa loza loatra anie ry lahy
Ny zavatra mahazo ahy!

Atao ahoana anefa moa
Raha izany no manjo!
Mila hahavaky fo,
Mety hankarary an-doha,
Mahakivy ihany koa
Fa ny tena very zo!

O! tsy maintsy hozakaina
Na dia hahafoizana aina,
Na dia mampiferinaina,
Mahaverivery saina,
Na mazoto, na malaina;
Eny, na ho very maina
Ireo ezaka rehetra.
Mba noheveriko hisy fetra
Ny fanaovan-tsetrasetra,
Hay vao mainka koa voretra
Ireo mpanao am-boletra
Fa tsy nitaredretra!


Mangina fotsiny ho’aho ny tena
Eo anoloan’ny faharesena.
Ka na ho teriterena
Ary koa hosihosena:
Izay Mangina Volamena,
Any aoriana manantena.

RFE Andria
--------