MBA IRIAKO (RFE Andria)
Pas encore lu
(Nalaina tao amin'ny vetso.serasera.org)
MBA IRIAKOMba iriako…
ny ho ilay rivotra fohanao mandavan’andro
ny ho mpanafana anao toy iry masoandro
manafosafo ny endrikao raha tonga ny maraina
mandrotsirotsy anao sy mamelombelon’aina
Mba iriako…
ny ho toy ny siotsiokam-borona milanto
manavatsava ny habaka amin-kira tena kanto
hampitako ilay hafatry ny foko am-pitiavana
handokoloko nofy ny fiainanao mba ho mavana
Mba iriako…
ny ho toy ny vonin-draozy soa sy manitra
mivimbin-tsiky sy hafaliana, haravoam-po finaritra
manaingo ny tontolonao, endriky ny hasambarana
topazanao fijery babo raha vao midi-baravarana
Mba iriako… Irariako… Fifaliako… Tena tiako…
raha izaho no ho ireo, tena tretrika ny diako
Saingy indrisy mbola nofo feran’ny elanelantany
ka ny vetsovetsom-po sisa no alefako mankany
RFE Andria – 04/07/2015
--------
Lien:
Catégorie :
Fitiavana
Fans:
jenahhilary