TIAKO IANAO MALALA AN ! (RFE Andria)

TIAKO IANAO MALALA AN !

Fony isika vao nitafa sy nanomboka niresaka
No toy ny notselaram-baratra ny foko ka nitresaka
Tsaroako ho nidonaka ilay foko izay voadotra
Tratry ny afom-pitia ka nibaradaka, nitsotra:
TIAKO IANAO MALALA AN !

Izany doboky ny foko rehefa ilay mifamotoana
Izay vao mainka mihamafy rehefa io mifanoloana
Dia manjary velon-kira, tsy misaina ny ho voabanty
Sy milaza tsy an-kihamba fa efa tena tsy tanty:
TIAKO IANAO MALALA AN !

Endrey ny haravoana sy hasambaran’ny fanahiko
Rehefa isika mifanoroka elabe fa tanarahiko
Mihovitry ny hafaliana izany tenako rehetra
Ka ny foko no mibaboka tsy arahina fepetra:
TIAKO IANAO MALALA AN !

Rehefa isika mifamihina dia lalovan’herinaratra
Ny tenantsika mifangia, noho ilay fitia tomarataratra
Hery anaty izay manosika hanambara tsy amin-tahotra
Izay mibahana ao am-po, amim-peo toa vahobahotra:
TIAKO IANAO MALALA AN !

Ilay isika indray andro niaraka niriaria sy nitositosy
Hatrizao mbola manako ato anatiko toa feon-dakolosy
Ireo teny mamy nobitsihinao tamin’izany tato am-poko
Dia ireo teny kanto indrindra toy ny avana miloko:
TIAKO IANAO MALALA AN !

Toa tsy ampy ny voambolana izay azoko anambarana
Ny fitia mipololotra avy ato am-poko izay tsy tana
Hany azoko atao dia ny mivaky tsotra izao
Mamosaka ny ato am-poko hibaribary eo aminao:
TENA TIAKO IANAO MALALA AN !

RFE Andria – 12/06/14
--------