VOHITRY NY NOFY (RFE Andria)

VOHITRY NY NOFY
Tsy noho ny setrinao mambabo izany foko
Tsy noho ny rimanao manafaka toloko
Tsy noho ny gadonao manaraka ny tendriko
Tsy noho ny vinanao mahita ny nafeniko
Tsy noho ny masonao mahalala ny hadalako
Tsy noho ny vetsonao mikoriana anaty rako
Tsy noho ianao mpameno ireo teboteboko
Tsy noho ianao mpamaly ny baraingo teloko
Tsy noho ianao mizaka ny ngidy izay tsy teliko
Tsy noho ianao mitsiky raha faly izany endriko
… Fa noho ianao iray Vohitry Ny Nofy amiko

Ikaloyna
19/08/14

Setrin’ny VOHITRY NY NOFY nosoratan’Ikaloyna…

Noho ilay Vohitry Ny Nofy izay iraisantsika
No nanainga ny foko hanao setriny nambabo
Noravahan’ireo rima natao tsy hisy tomika
Nahatonga koa ny vinako hahatakatra haabo
Ka ny hira notinendry no narahiko ny gadona
Dia ny masoko mijery miezaka hahalala
No nametsovetso, nandrava koa ny jadona
Sy hameno teboteboka midika mamanala
Dia ireo baraingo telo nanjary toa voavaly
Ka ny ngidy nosoloina ny mamy mahafaly
Ny tsiky nahamirana ny endrikao baliaka
Dia noho ny Vohitry Ny Nofy izay iraisantsika

RFE Andria – 20/08/14
--------