TARATASIN-JANAKAREO (Rolly Casimir)

TARATASIN-JANAKAREO

Any i Dada sy i Neny,
Manoratra ho anareo amin'ny
Rantsana mangovitra ilay sombiniainareo
Elaela kely aho tsy nandrenesam-peo
Fa rotoroto be ny fianaranay taty
Torovana ny saina, ny vatana mahia,
Ny volo mihintsan-dava

Salama ve i Dada?
Efa mba tsara ve ilay i Neny tsy salama?
Mbola any ve ireo namana sy akama
Niarahako nidola hatreny an-dakan-drano?
I Lila izao no reko hoe nanorin-tokantrano
Tamin'iny volana iny

Ny aty maha kivikivy e!
Ny boky atao omaly, aterina androany
Ny eo tsy mbola vita, ny eto miampy ihany
Ny tranom-boky lavitry ny toeram-pianarana
Ilay mandeha tongotra aza lasa fahazarana
Satria mitsitsy vola

Ny aty tsy vita mora e!
Tsy misy mba minitra hakana aina akory
Ny alina aza moa zara raha matory
Fa eo no mba fotoana hamitana vaky boky
Matetika aza aho voan'ny torimaso fotsy
Rehefa any an-dakilasy
......
Matetika tsy tanty
Ilay tsy mihinam-bary antoandro raha sendra tsy tafody
Ny laoka indray moa, raha tsy anana dia atody
Mety efa ho roa volana aho no nihinan-kena farany
Fa ny atody mora endasina ary antonony ny sarany
Ka ireny foana aloha

Ny vavony moa,
Efa tsy lazaina intsony ny aretina sy jaliny
Zakaina mora eny na inona farariny
Satria aty tsy misy hitarainana an'izany
Ampaham-pahasahiranako izany rehetra izany,
Fa manaraka hita eo indray

Ampy angamba izay fa
Miraraka mangina ny patraka tomaniko
Manao veloma anao aho ry Ray sy Reny mamiko
Mikendry no hoavin-njanany ho mendrika sy lafatra
Midina any ihany aho rehefa fialan-tsasatra
Amin'ny volana ho avy

Ny zanakareo

√Rolly Casimir√
--------