ILAY POETIN'NY FITIA (Tara-masoandro)

Dia nandrevy irery teo,
Tsy nahakimpy ireto maso, fa nidiridiry monja, toy ny lasa amboroa.
Tsy teto an-tany angamba, fa asa re nankaiza izany saina toa domelina,
Domelin'ireo lokon'ny tontolo anaty zava-boary.
Ny rivotra malefaka fitsoka
no mba nanosika ny rotsak'orana hisafo ireo takolaka efa mivaivay sy mena midorehitra,
Midorehitra fitia nipololoitra avy any anaty.
Efa minitra maro izay no niredareda teo, ilay afo toa nandoro saika nampitsonika hatramin'ny havokavoka.
Fa izy kosa, nijanona ho moana, ireo maso moa nivandraka,
fa tena latsa-damba tamin'ny hatsaran-java-kanto.
Ny peniny ihany no, navelany hanoratra tsy han-kiato.
Ary ireo karazan-doko no nahosony hitambatra,
Hampiseho ilay nofy an'eritreriny,
ireo konetaky ny fony,
sy ireo ainga misiteriny(...)

Tara-masoandro
--------