TSY HIVERINA (DADAFARAtolotra)

Dombo angady an-tany lonaka, ka tsy hiverina hitombana
Nivaro-mora tsy nahalafo, ka tsy hiverina hanombana
Aleo akatona ny pejy, izay voapenina fahiny
Ka ho rovitina ny boky fa, nangerok'iny lalana iny

Mbola ao himasoko ao, ireo tafiotran'ny tomany
Mijohy toa orana mikija, tena hoe nahavoto tany
Irony asa sy ny bainga, izay voavadika rehetra
Lasa fotaka avokoa, tsy misy hafahana mitoetra

Mafaitra tsiro toa tangena, mangidy lavitra toa vahona
Sasakalina mikitroka, fa tsy diavolantsembandrahona
Hazakazak'anaty haizina, tsambikimbikina aman-kipy
Godanam-pery tena lalina, tsy ho sitrana mihitsy

Miala fondro am-pitsikina, fa tsy mba azoko leferina
Maratra mafy ny fitiavako, ka tena tsy afaka hiverina
Raha ny taona tsisy ANAO, no hangazanina tsidihina
Vitako ny ankohonana, izay no azoko marihina
Ka miala tsiny aho fa tsy hiverina....!
--------