ny vady aman-janako (Nofy2)

ry Raiko ao ambony henoy re ny fivavako
raha toa ka sitrakao
topazo maso kely ny vady aman-janako
ho ampelantananao

tantano tsy hivaona hiala ny lalanao
na aiza no alehany
toroy sy ampianaro hanao ny didinao
fa Ianao no hianteherany

ireto ankohonako omeo ny fahendrena
sy hanam-pandeferana
hifankatia tokoa, hahay hanetry tena
na inona toerana

ny loza sy ny aretina ry Raiko mba sakano
tsy hihatra aman’aina
raha mafy ny fiainana, aoka mba tohano
fa Ianao no antenaina

ny asa sy fianarana ampio hazoto hatrany
ho mendrika tokoa
raha tojo ady sarotra mandrotsaka tomany
amboary ny ao am-po

fa tiako sy tsy foiko ny vady aman-janako
na ahoana na ahoana
aoka tsy hisy hanaisotra azy ireo eo an-tanako
fa hiaraka eny foana

Nofy2
22 Janvier 2018
--------