Fetin'ny Ray (raozigasy)

Dada
Raha mbola teo izao ianao
Dia vao maraina dia natao
Arahaba mamibe
Sy sangisangy be dia be

Dada
Raha mbola teo izao ianao
Dia hanihany sy lalao
No nifampiantsoantsika indray
Noho ity fetin’ny ray

Dada
Raha mbola teo izao ianao
Dia tsy izao tononkalo izao
No nosoratana maraina
Fa fitiavana zaraina

Dada
Raha mbola teo izao ianao
Dia ho anao no natao
Ny fiarahabana voalohany
Zay vao ny hafa sy ny tohiny

Dada
Raha mbola teo izao ianao
Dia nozaraina taminao
Ny hafaliana rehetra androany
Fetin’ny ray rehetra eto an-tany

Dada
Saingy ianao tsinona efa lasana
Mandry miadana ao am-pasana
dia tsiaro fohy sy tsiahy an-teny
Sisa ventesinay sy neny
--------