Namana (raozigasy)

Tao anaty sasa-kalim-pahanginana irery
No nifohazako indray, hikaroka ary koa hijery
Tao anaty solo-saina , sy tan-takelaka nizaha
Ireo zay endrika sy namana, mety hampifaly ny fanahy

Kanefa tamin’izay fotoana izay , tamin’iny alina iny,
No nifanenantsika koa , na samy olona vahiny
Dia tan-tsoratra niresaka, dia nitafa ka nitafa,
Nampiady karajia, tsy mba nisy nihafahafa

Dia nifankahazo am-po, tsy nisalasala intsony,
Namboraka tsiambaratelo, s’ireo vesatry ny fony
Nifampizara ireo takaitra, ireo fifaliana sy tantara
Hatramin’ny bitika indrindra, no nolazaina tsy voarara

Dia tsy nahatsiaro torimaso, fa teo koa no tra-maraina
Ary teo no nahatsapa, fa tena mamy koa ny miaina
Ka satry foana, hamoron-dresaka, hitazonana ilay namana
Ka tena ny fotoana mihitsy, no tiana hofikirina sy tanana

Kanjo indro ilay maraina, fa tonga koa nanarangarana
Ny hazavan’ny andro koa, nandroaka ilay aizina nifarana
Dia voatery isika hifandao, ka nifanome fotoana
Ka rahalina indray, an-tsoratra isika hihaona
--------