VADIKO A TIAKO IANAO (raozigasy)

Vadiko a “tiako ianao “
Izay ilay teniko,henonao
Raha vao misokatra ny vavako
Satria tiako ianao rahavako

Vadiko a, “tiako ianao”
Izay koa ilay voambolanao
Fataonao ambentin-teny
Rehefa amiko ianao miteny

Vadiko a, “tiako ianao,”
Izay ilay teniko sy ianao
Tenintsika roa mitambatra
Iombonam-peo tsy miambatra

Koa amin’izato andro androany
Mbola io teny io ihany
No ventesiko averiko
“Tiako ianao” anteriteriko

Ka na mandroso izany taona
Na isika roa tsy mihaona
N’aiza n’aiza misy antsika
Ny fitiavako tsy hipika

Fa efa natokako ho anao
Lamban’akoho izaho sy ianao
Hatramin’ny fara-fofon’aiko
Ny fitiavanao no ilaiko

Ka ireo androko tavela
Na ho fohy, na ho ela
Dia efa anao daholo
R’ilay tiako manontolo

Vadiko a “ tiako ianao”
Izay no teniko aminao
Amin’ity tsingerin-taona
“Tiako ianao” foana foana
--------