HASINA TABIHA (RFE Andria)

HASINA TABIHA

Injao fitarainana reko any ho any, tena manako
Hay tsy iza f’Ianao ry Fireneko no toy ny voalako
Feo maha ontsa toa minaonaona
Mandavan-taona…
Ireo izay natao mba hamelo maso ny soa notoavina
No indro nanao toa valalan’amboa sy nanavangavana
Indrisy ry Taniko, ry Fireneko!
Naleoko tsy teto…
Ankehitriny aho tsy afa-bela, tsy maintsy misikina
Raha ny fitiavako anao no ampariko, izaho tsy hidrikina
Tsy maintsy mijoro aho hitady ny very
Tsy afa-miery
Ka ho mariky ny fitiavako anao, voalohany indrindra
Ny fanajako ilay Tenin-dreny no ataoko mirindra
Hovelomiko indray hatrato anaty
Ho afo tsy maty…
Ny fihavanana izay nampalaza sy famantarana
Hasandratro ambony, hafatotro am-po toa fandrotrarana
Tezaiko tsara toa sombinaiko
Dia hohajaiko!
Ireo fomban-drazana nomen’ny Ntaolo, raha toa mahasoa
Manomboka izao dia mba hampitaiko sy angoniko koa
Ho lova hitoetra hatrany am-para
Ho an’ny dimby sy fara
Ireo fananana nireharehana dia ny rakitry ny ela
Ny kanto, ny vakoka ary koa ireo lalao izay sisa tavela
Hotehiriziko hatramin’ny farany
Hanohy ny tantarany…
Mahazo matoky Ianao r’ilay Tanindrazako, ry Fireneko
Raha mbola misy koa ireo zanakao izay manoratra eto
Ho tabihanay ny HASINAO
Manomboka izao!!!

RFE Andria – 03/06/14
--------