LAVI-TIANA (RFE Andria)

LAVI-TIANA

Any lavitra any ianao r’ilay vadiko malala
Fa izaho koa aty matoky sady tsy misalasala
Na dradraina ombieny fa ny lavitry ny maso
Tsy azo hihodivirana, izay mantsy ilay ankaso
Dia tsy maintsy ihany koa ho lavitry ny fo
Fa tsy mba toy izany ny fifankatiavantsika roa
Ka na lazaina aza fa ny afo lavi-tsy amindroana
Ny antsika ny halavirana mbola mahabe finoana
Fa tiako ianao! Ary azoko antoka ho tia ahy!
Tsy misy eo amintsika raha ny elanelam-panahy
Lavitra ianao raha noho ny elanelan-tany
Fa noho ny fitiavako dia eto anilako eto hatrany
‘zany moa malala ô !

RFE Andria – 21/10/14
--------