REHEFA TIA (Rina)

Rehefa tia ianao dia jamba
vita hatramin'ny manary lamba
avy hatrany ianao dia babo
na manana izy na mavomavo

Rehefa tia ianao dia manaiky
na fotsy izy na mainty
na tsotra na ngita volo
dia ahababo ny fonao manontolo

Tsy ny taona na fihaviana
no anilikilihana hoe tsy tiana
fa rehefa tsy ao ny fitiavana
dia mahavita ny manavangavana

Na be aza ny elanela-taona
dia inoako fa mety foana
tsy mahita ho tenenina
na mody marenina!

Tsy ho hitanao ny kilema
sy ny fahalemena
izy irery no fantatrao
rehefa tena tia ianao

Fa rehefa ianao no tsy tia
na tsy te hiara dia
dia mahita zavatra ho lazaina
sy ho tsikeraina
hitanao daholo
ny haratsiny manontolo

(02-02-2011
03-02-2011)
--------