RY ILAY DIARIKO MALALA (Tara-masoandro)

Ireo vetsoko mangina noraketinao an-tsoratra,
Aoka re hijanona ho tsiambaratelontsika.
Na takelaka iray monja, aza avela hisy hisokatra,
Fa lafo vidy loatra ireo ranomainty ritra.

Sarobidy mantsy
ireo teny an-tapitrisa tsy laitra nofihinina...
Aoka izany re ho tsiambaratelontsika.
Dia'lay sombin-dravin-draozy niangaviako ho tehirizina
Fehezo anatin'ilay pejy, mba hiafina tsy ho hita.

Io mantsy, 'lay pejy saro-pady mifono misitery.
Ka aoka re hijanona ho tsiambaratelontsika...
Tiako mba voaharo, tsy ho voasompatra amin-kery
Satria, nosoratako ao ihany 'lay fanalahidinao, sy ny toerany mangina.

Ôh... ry foko izay mitempo, mpandravaka ny anatiko
Ianao io re ilay diariko, mpandrodana ny ankasoko (...)

Tara-masoandro
21/09/2020
--------