MAMY LOATRA (DADAFARAtolotra)

Tsy ho sipasipa fotsiny na hanadala sanatriavina
No anton'diantsika roa aty ambovon'ny fitiavana
Fa ho vady andefimandry,hiantan-tsolofodimbinala
Ka ny fitiavana hanana, homena tsy an-kisalasala
Fa mamy loatra raha Ianao !

Hovolena anaty fo, hampandrobonina ao an-tsaina
Hatao safidy famaranana, hatrany amparam-pofonaina
Ka raha 'zay elanelan-tany tsy hafahana mitazana
Hamikirantsika sandry, avy eo dia hanidina vazana
Fa mamy loatra raha Ianao !

Iretsy andro sy ny volana, mivadibadika ho taona
Ireo lohasaha mitomban-davana izay voadidin'ny havoana
Fa ny fitiavantsika kosa atao voafefim-panajana
Ka ho todisoa ny lakana, amin'ny toerana hiampitana
Fa mamy loatra raha Ianao !

Hamaranako ny soratra, andeha isika hamboly dina
Fa mandra-maty ilay FITIA, na lafatra na fahorina
Ka ny tanjona himasoana, vetesintsika roa androany
Tsy misaraka intsony, raha mbola misy ety an-tany
Fa mamy loatra raha Ianao!
--------