You are here: home > Vetso

ILAY FASANA HO LAPAKO - Fidy Art Niaina

Azo vakiana?

Toerana iray hitoeran'alahelo
Izay rehetra mandalo eo misento daholo
Io ilay toeram-ponenan'avelo
Fitoeran'ny matoatoa sy ny lolo

Milahatra mitomandavana
Lapa fonenan'ny fanahy mireny
Tsy maintsy aleha; tsy misy fandavana
Vata-mitsotra tsy afa-miteny

Izato rindrina vato matevina
Eo amboniny misy tanambokovoko
Ao ireo havanay no milevina
Mba te hitoetra ao koa ny foko

Nisaratsaraka ny vata-nitambatra
Lo sy potika tsy afa-manoatra
Ny faniriako mba hiara-tsambatra
Aminareo havako lasa any Ankoatra

Fidy Art Niaina

Hametraka hevitra

Midira aloha