Ny gasy ankehitriny (heritreritro)

Ny gasy ankehitriny?

Olona efa very tanjona
Sy resim-pahantràna
Tsy miraika, tsy talanjona
... Manaiky fandrobàna

Ny gasy ankehitriny?

Manaranara-poana
Ny fomba avy any ivelany
Na ratsy izany na mivaona
Ny azy kosa dia navelany

Ny gasy ankehitriny?

Ao 'reo matin-kambo
Kanefa tsy tafarina
Variana mihaza lambo
Izay miezaky ny ho marina

Ny gasy ankehitriny?

Tsy mahalala intsony
Izany hoe fihavànana
Fa mialona ny fony
Raha havana no mànana

Ny gasy ankehitriny?

Be mpivavaka sy mpino
Fa vitsy ny azo hianteherana
Kolontsaina mpanadino
Rehefa azony ny toerana

Ny gasy ankehiny?

Ny vola ihany no miteny
Raha tsy izany tsisy mihaino
Na fampivoaram-pireneny
No anirahana azy hoe saino

Fa ny gasy ankehitriny?

Mba misy koa miezaka
Hanandratra ny fony
Mandroso tsy mifezaka
Tapa-kevitra sy tony

Fa ny gasy ankehitriny?

Mba misy koa tsy mety lavo
Fa vonona hatrany hiarina
Arahin-tsiky ravoravo
'zay dingam-bita dia hitarina

Fa ny gasy ankehitriny?

Ao koa ireo mifoha maraina
Andeha handranto fianarana
F'efa azony ao an-tsaina
F'io no tohatra fiakarana

Fa ny gasy ankehitriny?

Mbola misy olon-tsotra
Malala-tànana sy mihantra
Ny fihavanana dia zotra
Ny voin-kava-mahatratra

Fa ny gasy ankehitriny?

Marina fa be kilema
Fa tsy misy tonga lafatra
Fifankatiavana no antema
Firaisankina no hany hafatra!
--------