Embona (Ilay FANAMBY)

EMBONA,

Iny fitiavako anao iny, hafaliana sesilany,
Fitiavana manimoka iny no nameno ny tany

Iny tambitambiko iny,
Tontolo hafakely
Tsapanao ankehitriny
Rehefa ianao irery

Iny vetsovetso-tsika iny,
Tantara tsy navela
Mba ho tsiaron’ny fahiny,
Embona haharitra ela

Iny fitantanako anao iny,
Tantara tsy voarakitra
Fa toa lasa tsiny
Ilay soa saika sary

Iny fipetrahan-tsika iny,
Hazo tokana ho tsiaro
Nefa ahitra no naniry
Ialofan’ireo mpandalo

Iny moron-driaka iny,
Lasa rivotra mahery
Tsy toy ny fahiny
Nifoka rivotra malemy

Iny sangisangin-tsika iny,
Lasa adim-po mitoetra
Tsapanao ve ankehitriny
Fa ratra-po tsy mana-petra

Iny orokoroka mamy,
Nofinofy nandalo
Any ianao any ho any
Mamerina ny kalokalo

Veloma iny vitantsika iny,
Veloma satria lasa any
Mamangy ary ry fahiny,
Fa lahatra eto an-tany

(Ilay FANAMBY,embona,aogositra 2021)
--------