Midona moramora (Ny Avana Ramanantoanina)

Nantsain'i
(Nalaina tao amin'ny vetso.serasera.org)
Midona moramora
Ny any Ankaratra any;
Manembona isan'ora
Izay mandre izany.

Ny zavona mamono
Ilay Ambohimiangara,
Fa manina azy, hono,
Ny tiana, hany zara.

Manombana ho avy
Ny any Ambohimanoa;
Ny ranomasoko avy
No indray mirotsa-droa.

Mijojo vao maraina
Ilay Angavokely;
Ny alahelon-tsaina
Tsy hita velively.

Maneri-takariva
Ny eny Andringitra eny;
Ka dia " Mahatsiahiva "
No voalohan-teny.

Tomanitany lava
Ny fody eny Imanga.
Ny sento tsy misava.
Ny tiana tsy mitranga.

Tataovan-drahomanga
Iarivo indraindray;
Ireny miampanga
Fa manina izahay.

Veloma indrindra àry,
Veloma tsy doria;
Ka enga tsy harary,
Ry tiana sady tia.

Veloma mahatsiahy
No sisa holazaina.
Mandreraka fanahy
Ny ranomason-tsaina.

Tsiahivo anefa izao
Ny fara tononkira:
Ny sora-tananao
No hany " sovenira " .
--------
Rohy:
1259 0
Hametraka hevitra
Midira aloha
Momba ny tononkalo
Mpanoratra : Ny Avana Ramanantoanina
Nampiditra : jantina
Daty : 28/02/2022 16:52
Antsantononkalo
Nantsain'i
© Eugene Heriniaina - serasera.org 1999 - 2024 - page load 0.0097