Tsarovy (Ny Avana Ramanantoanina)

Tsarovy fa fihodinkodinana
No didy mitondra ny tany,
Fiakarana sady fidinana,
Korontana ambony sy ambany !

Ny ketraka mora mivarina,
Miroraka tonga kanosa;
Ny potraka nefa tafarina,
Ireny ka olona kosa !

Dia olo-mandala ny lazany
No sady mitandro ny zony,
Manandratra ilay Tanindrazany,
Manondrotra an'io ho ambony.

Mandritra ny andro iainany
Ka mandra-patoriny ho lo,
Izany no hany fisainany,
Fisainana tsy maintsy ho to !
--------