DISO LALANA (Ora)

Kamboty mbola zaza ianao ry MANITRALALAINA
Ka tsy mba nahalala ilay hoe fitiavan-dRay
I Neny irery mantsy no nitady izay ilaina
Sady nitaiza antsika enina mianadahy

Ianao no faravavy tamin’ny naterany
K’ilay fitiavan-dreny tsy manam-paharoa
Fitia ts’isy fatra no indro fa nazerany
Taminao ry zandry, eny nitobaka avokoa

Hatsiaka mamanala no notafian’I Neny
Niady irery izy satria “tokana-iray”
Nisikina, nifofotra, nitotototo ombieny
Mba itovizantsika amin’ireo manan-dRay

Nomen’I Neny anao fitia tena mamy
Fitaizaina tsara sady ara-pivavahana
Natokany ho anao ilay tena siramamy
Natorony anao koa izany ”tena làlana”

Hatramin’izao I Neny mbola miady ihany
Na dia efa hananika ny enimpolo taona
Rasomaso lava, sento ary koa tomany
“Tiany loatra mantsy ianao” ka tsy tantiny hoe hivaona

Dia avelanao ho very momoka va re?
Ny filofosany hatr’izay nanolokolo anao
Ianao hono mantsy tsy nanaraka arabe
Fa toa nivily làlana nanao ny tsy fanao

Tsy fantatrao intsony ny làlana mahitsy
Izay natoro anao teny an-tenantenan-dàlana
Toa hadinonao ireny anatra…. Indrisy!
Fa indro ianao nizotra nandray ilay sampanana

Nihoatra fefy ianao, nihoatra ilay vala
Toa tsy henonao ity Reninao Malala
Nandràra anao tsy hisotro, nitaona anao mba hiala
Nefa ianao vao maika tsy maty afon-tsigara

Honena anao iky izahay zokinao
Am-pijerena anao misedra ity fiainana
Heverinao mantsy f’izay no vaha-olana
Ka inianao tsy henoina ny anatra natao

Asa na ianao no tena mafy loha
Na izahay mpananatra no efa tsy mahavoa
Mino anefa aho ry zandrinay LALAINA
Fa any andro iray IANAO MBOLA HO TONGA SAINA.

2007, 20 Aprily
--------