HO AIZA ? (Totyjim)

Zary mangingina tsy ahitana teny
Manjonitra toa vorona tsy afaka misioka
Ny maso kaodikaody izay hita maha-sodoka
Manembonembon-dava tao zaza very reny
Miainga lalina any finiavana hitroatra
Hitroatra ho aiza anefa?
Ireto manodidina efa tsara voatra
Mampihemotra hilefa
Kivikivy foana tsy mahandry ny maraina
Isaina lava ny ora irina hisosa mafy
Te hahita fahasambarana fa tsy mahafoy miafy
Tsy mety hiray lalana ny fanahy sy saina
Dia manontany tena, ahoana indray ny ampitso
Inona no hitranga?
Ny marina anikeheo, rahariva mety ho diso
Fiainana kinanga.

Totyjim
--------