TSIARO (ho an'ireo mpahay mozika efa lasana) (Totyjim)

Nolalovan-drahona matetika nisesy
Ny tontolon'ny mozika sy ny seha-javakanto
Nahatsapana sento sy fijerin'olon-dresy
Alahelo niavosa ranomaso tsy hay naato
Tsarovako manokana indray alin'ny talata
Volana novambra fito amby roarivo
Nodimandry i "Toty" nitsotra anaty vata
Rehefa nialana nenina teto Antananarivo
Ireo mpankafy mozika indrindra fa ny jazz
Na mpihira na mpitendry, dia tonga niarak'ory
Nanati-boninahitra, nijery farany azy
Tonga nankahery sy niara-niaritory
Fotoana tsy ela akory taorian'izay
Dia lasa indray ra-Jim nanaraka ny diany
Nisintaka ny tany mba hody any amin'ny Ray
Fiononana no atelina tsy asiana antsipiriany
Ho anareo rehetra mpahay mozika efa lasana
Misaotra, mankasitraka namela mamy ho anay
Tsy hanafoana ny tsiaro raha izay varavaram-pasana
Any volana any taona, tsy maintsy mbola hihaona indray.

Totyjim
--------