RAHA HIFOHA NY AINGAM-PANAHIKO (voatsinampy)

Raha hifoha ny aingam-panahiko
ka hitory izay niainana
dia angamba tsy ho sahiko
ny hanambara fitarainana
ny alahelo izay nodiavina
teto an-tany fandalovana
ny hitanisa izay notiavina
sy hamongatra fahatsiarovana

Raha hifoha ny aingam-panahiko
ka hibaiko izany penina
dia angamba ho avahako
izay azo tokony ho tenenina
tam'ireo hatanorako
nilomano tam-pitiavana
ny fadisoam-panantenako
fa nasetrinao fandavana

Raha hifoha ny aingam-panahiko
ka hijonitra alahelo
dia tehiriziko ho ahiko
ireo tokony ho tsiambaratelo
nandritra ny andro fisandratako
teto an-tany ivahiniana
tsy zakako raha hosoratako
fa eleo ho ahy mangina

raha hifoha ny aingam-panahiko
ka hampiseho mibaribary
izay anjara mba ho ahiko
voavisavisany amin'ny sary
dia hosoratako tokoa
ka irariako ho tanteraka
hanasitra ity fo
tena valaka sy reraka
--------