INY ZANAKO INY (Volatiana Rahaga)

Iny zanako iny
no porofom-pahamatorako,
Iny zanako iny
no fahatanorako,
Amin'iny zanako iny
ihany koa ny fahatsorako,
Feno iny zanako iny
ny taratry ny fikasako.

Iny zanako iny
No tena adim-piainako,
Iny zanako iny
Lay tsy foiko tsy atakalo,
Izy iny indrindra koa
No tena odim-panaintainako,
Ho azy irery aho raha mifofotra mimalo.

Iny zanako iny,
No nahatonga ahy hivavaka.
Nampino ahy lanitra, zanahary sy Anjely.
Iny zanako iny no mba hany koa firavako,
Ary iriko raha maniry ny ho tonga SOA MIELY.

Iny zanako iny
tsy nahenoko manaintaina,
Niankinako ilay rindrina, niaretako ny mafy,
Eo akaikiny aho mahita fa hay mamy ery ny miaina,
Mampianatra ahy manome, mizara sy mihafy.

Iny zanako iny
Nampihiratra ny androko,
Nampisava izay mety ho maizina rehetra,
Izy mihitsy angamba no anjara masoandroko,
Tanin-drazako, Hasina, Lovako mitoetra.

Koa ho an'iny zanako iny 'zay mety dia-tongotro,
Azy manontolo izay efan'ireo tanako,
Iriko ho Soa Toaviny ny tsara indrindra atolotro,
I SOAMIELY koa no handova ny fananako.
VR.Anjoron-tany 31-07-08
--------