SOA IHANY (Volatiana Rahaga)

Tsy tahaka ahy izy,

Ny azy,
ny sarisary sy diary nomeko azy,
efa kila efa may.
Aminy,
sangy,vazivazy
andriran'antsy kay ny anay.

Baraingo no nanaingo
ny "tsy fantatra indray"
Izany no mba valin-teniny
amin'ny hoe: rahoviana
no fotoana mety hifanomezanay.
Ny vita manko hono tsy neniny!

Ny ahy
noheveriko fa matotra ireo voady,
safary kay ny azy!
Ireo lainga sy fitaka
nanambazany ahy
nandravaka ny tonantonako,
Lasa tempoly naoriny tsy nahy
teo an-tany lonako.

Dia mbola nahavitako
vavaka mihavaka
amin'ny "aza manadino".
Afo saika tsy voavono,
mbola nankao aho mbola nino.


Na ny figadon'ny
taona mety ho avy
aza nahatsiarovako azy.
ireo sangisangy andriran'antsy
mbola nandinaka ahy,
sady mbola nihantsy
toa raozy mariazy,
mitonon-tena hoe
ity re aho otazy.

Ilay raozy hay bobongolo,
Ny voady miaro fitaka,
Ilay afo koa mololo,
Soa ihany aho fa nisintaka
Zaho aho sambatra mibitaka
Izany moa mazava ho azy
Soa ihany..
'zaho tsy tahaka azy!

VR.
--------