MISY ANY (Volatiana Rahaga)

Misy any,

Tadidina efa ela,
Dia sary iray tavela.
Ritso-panahy efa voahidy,
Nofongarin'ny tadidy.

Sento iray mbola tsy levona,
Tafahitsoka mampievina
Nofy kely iray tomika,
Nahazo toerana sy bika.

Tana-masoandro kely iray,
Lasa empoka mahamay,
Erika tsy re nitaika,
Tonga orana mijananaika.

Hetsi-po tafahoatra
Nahita lalana nivoaka,
Dobo-po niloaka an-tratra,
Lasa emponempona tsy zaka.

Fotoana fohy tsy nihaonana
No efa lasa arivotaonany,
Fanantenana fitoventy,
Tonga hamaotonana vaventy.

Dia misy koa...

Alavirana misary ankaso,
Fitia lavitry ny maso,
Kanefa re sy tsapa koa,
Fa 'zay vao maika akaiky fo!

VR,Antananarivo,15 Aogositra 2008.
--------