NY FOKO "ENINA" (Volatiana Rahaga)

Ilay tononkalonao,
No tena lasa vaika,
Ientanan'ny fanahiko,
Tsy rototra tsy maika,
Mampisava ny ahiahiko.
F'efa hitako nandrasako,
Tehiriziko an-diary
Afeniko any TOLIARY.

Ny feonao 'zay
Mampandry fehizay,
Ireo samontamonta
Navoakan'ny hetsi-po
Zay mbola tsy matoy,
Mety amin'ilay hirako,
Notendreko namikirako
Mbôla tsara! tsara loatra,
Tsy misy mpanana,
Tahaka an'i ANTSIRANANA.

Ilay "isika"nifamihina,
Mbola imasoko eo ny sariny,
Avoakan'ny tadidy
Atobany, fongariny,
Madio mangarangarana,
Raha niala tao FIANARANA.

Ilay orokao mangina,
Mbola eo imolotro eo,
Mamerina hamamiana,
Toy ny avelon'olon-tiana,
Nalevina anirony,
Hay tsy mamy fa
-TOA-MASINA- ny tsirony!

Dia indro ny fo amam-panahiko,
Matoky tsy manahy,
Fa ho anao irery sy ahiko
'Zay hirantsika 'zay.
Ifankahita indray,
Hiriaria, malia,
Ivolana fitia
Hameno ireo 'zay banga
Eto hatrany MAHAJANGA.

Raha sanatria tsy tody,
Fa be sakana ny lalana,
Ny akony itampody,
Ivadika ny lakana.

"Fitia"ampitondraina!
Ataovy be dia be
Tsenaiko eny Sambaina,
Entiko any ANTSIRABE.

Lalina 'lay fitiavana
Nomeko anao rahavana,
Moa va tsy Manangareza?
Mafonja sy mateza.
Tsy taza-maso, tsy marivo,
Akaikikaikin'ilay foko,
Toa an'i ANTANANARIVO...

Voatetintsika tsisy nenina
'Reo faritany enina
Sy ireo hatsarany fanaperana,
Tsara mandroso sy miverina!
Raha hivezivezy koa tsy ferana...

VR,Anjoron-tany,02-06-08.
--------