MAZÀNA NY OLON-KENDRY (AnjaraNivo)
(Nalaina tao amin'ny vetso.serasera.org)
MAZÀNA NY OLON-KENDRYMazàna ny olon-kendry raha nipoiran'ny hadisoana:
Avy hatrany dia mifona.
Avy hatrany dia mibaboka, hanova ny famindrany;
Ka na dia fahendrena kely monja aza voadingany,
Dia afobe iny aminy.
Mazàna ny olon-kendry tsy mba manambàny ny hafa,
Tsy manan-tsaina hikasa
Na manan-tsaina hikatsaka, hanambaka ny efa osa.
Fa mantsy ny hevi-petsy dia karazandrazan-trosa
Tsy ho voahefa rahatrizay!
Mazàna ny olon-kendry tsy mba tia mampiasa sandry,
Tsy tia manangana ady,
Tsy tia manangana olana amin'ny hevitra tsy iraisana;
Fandrao ahavanin-doza na mety ahita faisana,
Raha tsy mahatandrin-tena.
Mazàna ny olon-kendry no voalaza ho tia mandefitra.
Hany ka mandetika,
Hany ka manitrika ny marina tsy hipoitra;
Ka mampahazo vahana ireo tsy maty manota.
"Izay no lafy ratsiny"!
Ainampaniry Anjara Nivo
--------
Lien:
Fans:
Ainampaniry Anjara Nivo
Commentaires
KALONANTITRA
(
29/07/2024 06:40)
Mankasitraka! Tsara kokoa anefa, isika mpanoratra, raha tena mahavoafehy ny fanoratra ny tenin-drazantsika! Ohatra : "Fandrao ahavanin-doza na mety ahita faisana" / Ahitsiko : "Fandrao hahavaon-doza na mety hahita faisana". Inoanko fa "olon-kendry" koa ny Mpanoratra!
