TAKONA (Fidy Art Niaina)

Oh! Ilay fandoto an-tandroka iray
no zary nanimba ity fandio iray siny.
Hadino ireo soa izay natao hatrizay,
fa sendra hadisoana ka nibaby tsiny

Injao fa zakaina ny eso sy latsa;
ireo vava tsy ambin'ny fo misendoatra.
He! Ny tsara natao ity toa ririnin-dasa...
Mandreraka aina sy mahakivy loatra.

Ketraketraka, indrisy, ny fo sy fanahy,
mandre fanenjehana tsy hahafaha-mandositra.
Fa ilay hadisoana izay nisy tsy nahy,
no singam-bolo nandavo ny vositra.

Fidy Art Niaina - 05 Septambra 2025 - 08h31
--------